Other languages:

Sumarlegi SAMAN hópurinn

Föstudaginn 6. júní 2008 hleypir SAMAN-hópurinn (www.samanhopurinn.is) sumarverkefni sínu af stokkunum. Það er ,,Fjölskyldan í fókus",  ljósmyndasamkeppni sem ætlað er að vekja athygli á að samverustundir með fjölskyldunni eru dýrmæt augnablik í lífi hvers og eins. Fjölskyldur af öllum stærðum og gerðum eru hvattar til að senda myndir í keppnina af fjölskyldunni saman, við leik og störf, vetur, sumar, vor og haust.

Mikilvægi samverustunda fjölskyldunnar fyrir þroska barna er óumdeilt. Ýmsar kannanir sýna að börn og unglingar vilja verja meiri tíma með foreldrum sínum heldur en þau eiga kost á í dag. Börn sem verja miklum tíma með fjölskyldunni, fá mikinn stuðning en jafnframt aðhald frá foreldrum eru að öllu jöfnu ólíklegri til að neyta áfengis- og annarra vímuefna. Þau eru einnig líklegri til að standast neikvæðan hópþrýsting.

Með ljósmyndasamkeppninni ,,Fjölskyldan í fókus“ vill SAMAN-hópurinn vekja athygli á öllum þeim fjölmörgu fjölskyldum, af öllum stærðum og gerðum, sem eiga góðar stundir saman. Ennfremur viljum við hvetja fjölskyldur til að fjölga þessum stundum.

Katrín Jakobsdóttir þingmaður ýtir ljósmyndasamkeppninni úr vör og opnar um leið nýja heimasíðu SAMAN-hópsins. Athöfnin fer fram í Vesturbæjarskóla við Sólvallagötu og hefst kl. 13:30. Slagverkshópur nemenda í Vesturbæjarskóla undir stjórn Nönnu Hlífar Gylfadóttur gefur tóninn fyrir sumarið. Sumarlegar veitingar í boði. Okkur þætti vænt um ef þú tækir þátt í þessum atburði með okkur!