Other languages:

Spilastokkar að gjöf til allra 5.bekkinga og fjölskyldna þeirra

Nú annað árið í röð sendir SAMAN-hópurinn öllum börnum í 5. bekk á landinu spilastokk að gjöf. Markmiðið er að hvetja til samverustunda fjölskyldunnar og á spilin eru prentuð heilræði til barna og foreldra se undirstrika mikilvægi samveru fjölskyldunnar. Að baki heilræðum liggja  niðurstöður vísindalegra rannsókna sem hugmyndafræði SAMAN-hópsins  byggir á en hún er sú að samvera fjölskyldunnar sé ein besta forvörn sem völ er á. Verkefnið er styrkt af Pokasjóði.

Hópurinn hefur farið þess á leit við grunnskólana að koma jólagjöf SAMAN-hópsins til skila og þakkar þeim og sveitarstjórnum kærlega fyrir samstarfið í þeim efnum. Það er von okkar að gjöfin nýtist börnum og fjölskyldum þeirra til innihaldsríkra og skemmtilegra samverustunda nú í desember og næstu árin, jafnt á tyllidögum sem hversdags.

Mánudaginn 29. desember hittust nokkrir fulltrúar SAMAN-hópsins í Félagsmiðstöðinni Garðalundi til að pakka spilastokkunum til sendingar um allt land. Þar ríkti sannkölluð jólastemning og mikill handagangur í öskjunni svo allt kæmist til skila.